Tenisti serb, Novak Gjokoviç dhe gruaja e tij Jelena kanë rezultuar negativë në testet për koronavirus, ka njoftuar ekipi i tij për komunikim me media më 2 korrik, 10 ditë pasi është bërë e ditur se çifti ka rënë në kontakt me sëmundjen Covid-19.
Gjokoviç ka dalë pozitiv në këtë virus pasi ka marrë pjesë në një turne që kishte organizuar ai në Serbi dhe Kroaci, në kohën e pandemisë.
Në ndeshjet e zhvilluara në Beograd dhe Zadar nuk është mbajtur distancë fizike.
“Novak Gjokoviç dhe gruaja e tij Jelena kanë dalë negativë për Covid-19. Kjo është kuptuar në rezultatet e testeve që ata kanë kryer në Beograd”, ka thënë ekipi i tij.
Të dy, si Gjokoviç, ashtu edhe gruaja e tij nuk janë përballur me simptoma të sëmundjes dhe kanë qëndruar në vetizolim në Beograd, prej kur kanë kuptuar se janë infektuar.
