Në një komunikim për mediat pas seancës dëgjimore me SHISH, në Komisionin e Sigurise, deputeti demokrat Flamur Noka tha se hakerat iranianë dhe rusë kanë në dorë çdo të dhënë të qytetarëve shqiptarë duke akuzuar qeverinë Rama se nuk bën transparencë.
Gjithashtu, ai tha se në komision u konfirmua hakerimi i sistemeve TIMS dhe MEMEX, ndërsa vetëm sot hakerat publikuan listën e personave në kërkim.
“Kjo qeveri dhe kjo mazhorancë nuk njeh limit, kërkojnë të mos kenë dijeni deputetë të opozitës për gjëra që kanë dijeni sot vende dhe shërbime jo mike. E gjitha rrotullohet rreth faktit se shqiptarët nuk duhet të informohen dhe nuk duhet të kenë transparencë sa i përket cënimit të sigurisë kombëtare. Drejtori i komanduar i SHISH nuk tha asnjë gjë. U konfirmua që është hakeruar sistemi TIMS dhe MEMEX i Policisë së Shtetit që cënon rëndë sigurinë kombëtare”, tha Noka.
