Për herë të tretë në historinë e operas shqiptare TKOBAP ka vënë në skenë sonte shfaqjen “Peshkatarët e Perlave”. Vepra e njohur e kompozitorit francez Georges Bizet këtë herë mban vulën e sopranos Inva Mula. Në vitin 1990 Inva Mula interpretoi rolin e Leilas, duke pasuar të ëmën, Nina Mula që u ngjit në skenë me po të njëjtin rol në vitin 1964.
Sopranoja me famë ndërkombëtare është rikthyer sonte në këtë premierë si regjisore e shfaqjes ndërsa Leila u interpretua nga Ramona Tullumani.
Opera rrëfen historinë e dy miqve që humbën njëri-tjetrin për hir të dashurisë për të njëjtën vajzë dhe pasi u rigjetën u betuan për besnikëri të përhershme. Por Leila u kthye sërish…Sakrificë, dramë e stuhi… por në fund triumfon miqësia e dashuria.
Opera do të vihet në skenë edhe në datat 24 e 25 shtator në orën 19:00 në Pallatin e Kongreseve nën intrepretimin e sopranos Inva Mula dhe Simona Karafili.
