Zëvendësministri për zhvillimin rajonal, Maqis Voridhis (Makis Voridis) është njëri nga drejtuesit e Lëvizjes për Çlirim e Vorioepirit “MAVI”. Në foto keni pikërisht anëtarin e kabinetit qeveritar grek.
Mediat evropiane janë tronditur nga pjesëmarrja në qeveri e anëtarëve të partisë LAOS, e cila është parti ekstremiste fashiste.
Maqis Voridhis është anëtar i Komitetit Ekzekutiv të LAOS-it që nga viti 2005 dhe më 2009 iu zgjodh sekretar i grupit të deputetëve të partisë LAOS.
Po cila është një gjëmat më të mëdha që ka bërë MAVI në Shqipëri?
Më 10 prill 1994, në orën 02:40 një komando greke prej tetë personash me uniforma të ushtrisë greke hyri në territorin shqiptar, në afërsi të fshatit Peshkëpi pranë një reparti ushtarak. Komandoja vrau në befasi ushtarin Arsen Gjini, kapitenin Fatmir Shehu dhe lëndoi tre shqiptarë.
“Këto i keni për Vorio Epirin!”,- kanë thirrur, ndërsa gjuanin. Gazeta “Elefterotipia” publikon lajmin se vrasja është marrë përsipër nga grupi terrorist “MAVI” (Fronti për Çlirimin e Epirit”.
Kjo natë do të mbahet mend nga të gjithë shqiptarët, sepse vendi ynë u gjend përballë një agresioni ushtarak. Një repart komando hyri nga Greqia 4 kilometra në tokën shqiptare. Pasi kishte studiuar më parë planin, njerëzit që mbanin veshur uniforma ushtarake, sulmuan postën kufitare të Peshkëpisë. Bilanci dy të vrarë, tre të plagosur. Komandoja greke kishte zgjedhur si moment të duhur për të sulmuar, kohën kur i gjithë reparti kishte rënë në gjumë. Dy persona me uniformë dhe maska hynë në korridorin e kazermës. Komandanti i stërvitjes, Fatmir Shehu, u foli të panjohurve, duke u kërkuar të kursenin ushtarët, por ata e qëlluan me armë duke e lënë të vdekur. Më parë, maskat kishin ekzekutuar edhe ushtarin Arsen Gjini. Tre rekrutë të tjerë mbetën të plagosur gjithashtu.
Nën kërcënimin e armëve maskat që flisnin greqisht duke përmendur Vorio Epirin, i mbyllën 130 ushtarët në një dhomë, kurse dy oficerë të tjerë i izoluan në një zyrë tjetër. Ky ishte versioni zyrtar i shtetit shqiptar, porse në traktin e organizatës “MAVI” botuar edhe nga shtypi grek, shkruhej: “Organizata patriotike MAVI, pasi studioi me kujdes kushtet dhe operacionin që do të kryente në janar 1994, i dha urdhër njërës prej skuadrave të saj të armatosura që të godiste një repart ushtarak shqiptar, pranë vijës kufitare. Në orët e para të datës 10 prill, ditë e djelë, në bazë të informatave të dhëna nga “Seksioni i mbledhjes së informatave”, skuadra PIRRO-l, e përbërë nga një grusht luftëtarësh, gjendjej në pozicionin e vrojtimit të objektit, në një kodër aty pranë”.
