Ish-Presidenti i Republikës, Bujar Nishani, u shpreh se Partia Demokratike ka qenë e përçarë në 4 -5 vitet e fundit, një përçarje që u thellua edhe më tej nga Lulzim Basha pas zgjedhjeve të 25 prillit.
Në një prononcim për mediat, Nishani thotë se Kuvendi hodhi bazat e ringritjes dhe modernizimit të PD-së, ndërsa shtoi se do i bashkohej protestës së thirrur të hënën e 20 dhjetorit.
A po i thellojnë ndasitë brenda PD-së?
Bujar Nishani: “Shqetësimi është i drejtë por në 4-5 vitet e fundit PD ka qenë vazhdimisht në një proces përçarjeje. Pas 25 prillit qëndrimi që u mbajt nga ana e lidershipit në drejtimin e PD-së u thellua më shumë përçarja. Edhe para kuvendit kombëtar PD ishte më e përçarë se kurrë në historinë e saj që nga themelimi. Kuvendi hodhi bazat e bashkimit, ringritjes dhe modernizimit të PD-së. Këto sfida që ka PD do të kalojnë pasi PD ka eksperienca shumë positive në kontributet e saj, qoftë si parti e qoftë si qeveri. Ka dhe eksperienca të hidhura të atakimit politik. Jo pak herë ka qenë objekt i skenarit të copëtimit e dobësimit të saj. I ka kaluar me sukses dhe gjithmonë zgjidhja është gjetur tek anëtarësia. Jam I bindur se kjo frymë që ka krijuar lëvizja për ringritjen e PD i ka munguar. Ringritja nuk është e thjeshtë. Por kur ekziston vullneti dhe transparenca të gjitha bëhen të mundur pë tu realizuar. Deri më 22 mars kur është kuvendi PD do të përfshihet në një proces rifreskimi dhe rigjenerimi nga seksioni deri në kryesinë e PD-së.”
