Ish-Presidenti Bujar Nishani ka nënvizuar, pas takimit me kreun e shtetit Ilir Metën se Kushtetuta e Shqipërisë, që nga Presidenti e deri tek çdo qytetar, duhet të zbatohet.
Nishani shkruan në Facebook se nuk ka alternativë tjetër pasi integriteti i Shtetit Shqiptar, të drejtat themelore të qytetarëve shqiptarë, funksionimi i shtetit ligjor, vetë Demokracia në Shqipëri nuk mund të dorëzohen më si në 1944.
Në mesazhin e tij në Fb, Nishani shprehet:
“Sot pata një takim me Presidentin e Republikës, fokusuar tek situata e rëndë e agresionit të maxhorancës qeverisëse mbi Kushtetutën e vendit, Institucionin e Presidentit të Republikës dhe Gjykatën e re Kushtetuese që po krijohet.
Kushtetuta e Shqipërisë është e qartë si kristali në lidhje me formimin e kësaj Gjykate superiore !
1- Gjykata Kushtetuese përbëhet nga 9(nëntë) anëtar, 3(tre) zgjidhen nga Presidenti, 3(tre) zgjidhen nga Parlamenti dhe 3(tre) zgjidhen nga Gjykata e Lartë!
2- Anëtari i parë zgjidhet nga Presidenti, anëtari i dytë zgjidhet nga Parlamenti, anëtari i tretë zgjidhet nga Gjykata e Lartë e kështu rradha përsëritet deri tek anëtari i 9(nëntë).
3- Anëtari i Gjykatës Kushtetuese fillon deryrën pasi betohet përpara Presidentit të Republikës.
Kjo është Kushtetuta e Shqipërisë të cilën që nga Presidenti i Republikës e deri tek çdo qytetar duhet ta zbatojë, ta respektojë dhe ta mbrojë!
Në këtë rast nuk ka alternativë tjetër !
Nuk ka alternativë tjetër pasi integriteti i Shtetit Shqiptar, të drejtat themelore të qytetarëve shqiptarë, funksionimi i shtetit ligjor, vetë Demokracia në Shqipëri nuk mund të dorëzohen më si në 1944″”
