Kreu i shtetit ka dekretuar shkarkimin e Shkëlqim Canit nga Ministria e Financave dhe shkarkimin e Arben Ahmetajt nga ministria e Ekonomisë por ende nuk ka shpallur dekretin për emërimin e Ahmetajt te Financat dhe Milva Ekonomit te Ekonmia
Nëse nuk është lojë me nervat e kryeministrit Rama, presidenti Bujar Nishani është duke kërkuar kleçka në cv e dy ministrave të rinj të emëruar nga kryeministri Rama. Presidenti Nishani ka shpallur pak çaste më parë vetëm dekretet e shkarkimit të dy ministrave, atë të Shkëlqim Canit nga Ministria e Financave dhe Arben Ahmetajt, nga detyra e ministrit të Ekonomisë.
Në faqen zyrtare të presidentit të republikës është shpallur dekreti i kreut të shtetit vetëm për pjesën e parë të propozimit të kryeministrit por ende për për pjesën e dytë. Nishani nuk e ka shpallur ende dekretin për propozimin e Ramës për emërimin e Arben Ahmetajt në detyrën e ministrit të Financave dhe atë të Milva Ekonomit te ministria e Ekonomisë.
Në rastin e largimit të Nasip Naços dhe zëvëndësimin e tij me Ylli Manjanin te ministria e Drejtësisë, Nishani shpalli në të njëjtën kohë dekretin për shkarkimin dhe emërimin e ministrave. E njëjta situatë ka ndodhur edhe me largimin e Ilirian Celibashit dhe zëvëndësimin e tij me Ermonela Felajn.
Kryeministri Rama vendosi një ditë më parë, shkarkimin e Canit nga financat dhe zëvëndësimin e tij me Ahmetajn i cili drejtoi ministrinë e ekonomisë për dy vite. Në vend të Ahmetajt në ministrinë e Ekonomisë u emërua Milva Ekonomi, e cila mbajti postin e zvministres së shëndetësisë për më shumë se dy vite.
