“Të helmëta, farmak këto lajme, dot vetëm si mbaja. Le t’i lexojnë “prijsat” tanë nga Kryeministria…e le t’i lexojnë ata, që ky mëngjez i gjeti tek Çadra…”
Nga Hekuran Halili
Lajme të helmëta
…Ta prenë dhe ullirin e madh tek porta,
Atë, mjekërrgjelbërin,me bina hata,
Atë ,
Që Odisenë doli e priti kur kthehej nga Troja,
Dhe e përcolli tek Penelopa,
Më solli mbrëmë lajmin e helmët Era…
Nisa vajrënkimin.
Gjëmëmadhja Çamëri,
Po t’i presin e ullinjtë,
Të vetmit që dot si dëbuan,
Se mos tregojnë të kujt janë,
Se mos dëshmojnë,
Për krimet që kanë parë…
E prenë e një lis , e hoqën e një gur,
Nga lisnajat e kulla e Isë Boletinit,
Shtoi Era, lajmet e helmëta…
E ngrita zërin tim të vajrënkimës,
I çorra faqet e për Kosovën,
Por s’ishte gjë me kaq,
S’kish të pushuar era me lajme të helmëta,
Këtë darkë të marrë.
Kanë prishur në Manastir shtëpinë e A,B,C-së,
Shtoi , gati duke qarë…
Të helmëta, farmak këto lajme, dot vetëm si mbaja,
Le t’i lexojnë “prijsat” tanë nga Kryeministria…
Le t’i lexojnë ata, që ky mëngjez i gjeti tek Çadra…
