Ditën e sotme ka nisur viti i ri akademik shkollor. Edhe këtë vit, procesi mësimor në sistemin 9-vjeçar dhe të mesëm do të zhvillohet me turne dhe me orar të reduktuar në pjesën më të madhe të shkollave. Disa prindër kanë firmosur një peticion online, duke kundërshtuar zhvillimin e mësimit me turne dhe me orar të reduktuar.
Kjo i diskutua në emisionin “Abc-ja e mëngjesit” me zëvendës kreun e Sindikatës së Pavarur të Arsimit, Isa Halilaj dhe arsimtares Alketa Ipeku. Ata shprehën shqetësimin se me shkurtimin e orëve, cenohet dhe cilësia e mësimdhënies duke bërë që për të tretin vit radhazi, fëmijët po marrin dije të cunguara në kushtet e pandemisë.
“E kishim një pjesë online dhe një pjesë në shkollë por përsëri ishte e cunguar duke u thelluar filloi hendeku në arsim. Cilësia e arsimit po cenohet në mënyre drastike. Ndikon sepse nuk të del koha të pyesësh nxënësin. Si mund ta kontrollosh këtë nxënës? Në 60 minuta të një lënde, jepet tema e re në çdo orë. Do e kompensojmë kohën e humbur me nxënësit dhe ti shpjegosh paqartësitë e mundshme të lëndës. Kemi lëndët shkencore që nxënësit përballen në mënyrë drastike.”, tha Ipeku. /abcnews
