Ka nisur pak minuta më parë protesta e qytetarëve kundër ligjit për importin e plehrave. Me mijëra qytetarë janë në shesh për t’i kërkuar qeverisë dhe parlamentit ndaljen e importit të plehrave. Protesta ka nisur në sheshin para Parkut Rinia dhe vazhdon përgjatë bulevardit. Forca të shumta policie janë organizuar për të mbajtur nën kontroll protestën.
Pak ditë më parë mazhoranca miratoi në parlament ligjin që lejon importin e plehrave në Shqipëri. Prej atij momenti, ka pasur reagime të ashpra të qytetarëve kundër qeverisë, kryesisht në rrjetet sociale. Sot është dita për të parë se sa aktivë janë qytetarët jashtë rrjeteve sociale dhe sa konkrete do të jetë protesta e tyre kundër qeverisë për të ndalur kthimin e Shqipërisë në një kazan plehrash për vendet e BE-së.
