Ministrja e Arismit, Lindita Nikolla, i kërkon politikës të qëndrojë larg nga procesi zgjedhor në Universite. Përmes një deklarate për mediat, Nikolla tha i ka bërë thirrje gjithashtu pedagogëve dhe studentëve, ta përmbyllin garën si një proces zgjedhor model ku fitojnë më të mirët. Ministrja Nikolla shprehet se gara duhet të jetë e hapur, transparente dhe e ndershme. Duke u ndalur te kërcënimet për kandidatët, Nikolla tha se kjo garë u ndesh nga një situatë e pakëndshme.
“Dëshiroj të përshëndes sot deklaratën e rektoratit të Universitetit të Tiranës, të nënshkruar nga disa prej profesorëve më të spikatur të sistemit universitar në Shqipëri. Bashkohem me thirrjen e profesorëve për vijimin e garës të hapur, transparente dhe të ndershme, për drejtuesit e ardhshëm të universiteteve në mbarë vendin. Sigurisht, çdo garë ka sfidat e veta!Në garën për të zgjedhur drejtuesit e departamenteve, dekanët, senatorët dhe rektorët, sfida e vetme janë shkalla akademike dhe platformat për cilësi në arsimin tonë të lartë. Kjo është një garë pa ndërhyrje nga qeveria apo politika.E tillë ka qenë gara deri dy ditë më parë kur, fatkeqësisht, ndeshëm një problem të vështirë e totalisht të pakëndshëm, i cili, për fat të mirë, u kapërcye menjëherë falë gatishmërisë dhe profesionalizmit të institucioneve të shtetit.
Më tej, në deklaratën e Nikollës thuhet: Si Ministre e Arsimit, dëshiroj të siguroj të gjithë kandidatët, pedagogët dhe studentët, që janë pjesë e kësaj gare, por edhe mbarë publikun, se kemi bërë dhe do të vazhdojmë të bëjmë ç’është e mundur që zgjedhjet në universitete të jenë model, siç i shkojnë për shtat çdo institucioni të arsimit të lartë në vend.
