Situata e reshjeve të borës në qarkun juglindor të Korçës është normalizuar gjatë orëve të natës, por i ftohti ka “mbërthyer” vendin. Mësohet se të gjitha akset nacionale janë të hapura e po ashtu të kriposura, por sërish duhet kujdes në qarkullim.
Temperaturat mëngjesin e sotëm arritën në zonat e thella deri në -18 gradë, ndërsa momentalisht nuk ka reshje bore. Lartësia e borës varion nga 10cm deri në 40 cm, ku lartësia më e madhe është në fshatin e Dardhës. Në këtë fshat e po ashtu në Qafën e Qarrit duhet që mjetet të jenë të pajisura me goma dimërore.
Temperaturat e ulëta pritet që të jenë prezente në vendin tonë edhe në ditët e para të javës së ardhshme, ndërsa ARRSH njoftoi më herët se nuk ka akse të pakalueshme, por bëri thirrje për kujdes dhe shmangien e lëvizjeve të panevojshme.
