Temperaturat e ulta që kanë “pushtuar” vendin tonë në këto ditë kanë sjellë dëme të shumta për fermerët. Një shqetësim të tillë e kanë ngritur sot fermerët e Roskovecit, të cilët shprehin se shumë prodhime u janë prishur dhe po iu shkojnë dëm. Në një prononcim për mediat ata thonë se, më shumë janë tek fidanët e domateve ku edhe pse janë mbjellë në sera me dopio plastmase, i ftohti ka depërtuar duke ju shkaktuar dëm të madh ekonomik.
Një fermer reagoi se janë rreth 3 mijë fidanë në serë, nga këto 200 të prekura. Fermeri shprehet se kishte vetëm 3 javë që i kishte mbjellë dhe u shkoi dëm i gjithë sezoni janarit. Ai tha po ashtu se ka rreth 7 vite që e ka ngritur si biznes familjar, duke punuar dhe në emigracion por këto dëme po e çojnë drejt falimentimit. Apeli i tyre shkon për subvencione dhe ndihmë që të rimbjellin përsëri serat, apo për ulje të çmimit për blerjen e farave.
“Po na ndihmuan që ti marrim farat me përqindje të ulët, e mbjellim. 3 javë këtu unë dhe na shkoi dëm, 4 persona të familjes duke u marrë me to. Ah shpenzimet! Dhjetëra fidanë ikën kot, të ardhura nga shteti s’kemi. Po foli shteti me këta të farishtes që të na ulë çmimin. Mua më bëjnë dëm rreth 1 milionë e gjysmë lekë që kam derdhur, i kam fituar me punë në Greqi. 1 dynym kam mbjellë, 2500 bimë janë prekur nga i ftohti. Ka dhe plot fermerë të tjerë të prekur, por askush nuk na sheh me sy, nuk na ndihmon”, u shprehën fermerët.
Ndërkohë kujtojmë se këtë vit fermerët e Roskovecit janë përballur më herët edhe me përmbytje, të cilat gjithashtu dëmtuan shumë prodhimin e tyre, por askush nuk i ndihmoi.
