Protestues nga qytete të ndryshme kanë ardhur sot në Tiranë, për të kundërshtuar rritjen e çmimeve dhe për t’i kërkuar qeverisë të plotësojë kërkesat e tyre. Një pensionist tha se ka ardhur nga Dibra për të kërkuar të drejtat e tij, ku përmendi se sot duhet të protestohet edhe për Skavicën. Ai tha se merr vetëm 150 mijë lekë pension, me të cilat nuk paguan dot ilaçet, pasi qeveria nuk ia rimburson.
“Është një qeveri mafioze, jo për popullin dhe njerëzit e varfër. Kemi ardhur të protestojmë për çmimet, pensionet. Jam 83 vjeç dhe marr 150 mijë lekë të vjetra, nuk mbuloj dot shpenzimet vetëm për shëndetin. Kemi ardhur nga Dibra për të protestuar për Skavicën.
Po na merr nëpër këmbë Dibrën, që ka sakrifikuar me shekuj për atë truall. Do të bëjë një Hidrocentral që nuk ja vlen barra qiranë. Janë 9 Hidrocentrale deri tani, Dibrën ai e shuan përfundimisht. Jemi këtu që kjo masakër të mos i bëhet Dibrës“, tha ai. Ndërsa shumë protestues të tjerë shprehen se me rritjen e çmimeve tashmë nuk blejnë dot as bukën dhe ujin, ndërsa nuk bëhet fjalë për ushqimet e tjera.
