Nga Blendi Salaj
Një intervistë, e konsideruar e fundit e jetës(link is external), që gruaja (dhe bashkëpunëtorja, do shtoja) e ish-diktatorit Enver Hoxha dha për gazetaren Rudina Xhunga ka shkaktuar reagime të forta kundërshtuese, dhe disa mbështetëse ndaj gazetares. Personalisht nuk e ndoqa intervistën, sepse për mua nuk paraqet asnjë interes ajo çka Nexhmija thotë për Nexhmijen, ndaj nuk mund të përcjell një përshtypje personale mbi pyetjet e përgjigjet, por nga transkripti që mund të lexoni në faqen dritare.net shihet se ka shumë pyetje romantike si për shembull njohja dhe rënia në dashuri me Enverin bukurosh, apo kuriozitete të llojit, “Ju keni qenë personazhi kryesor i filmit “Vajzat me kordele të kuqe?”, të cilat ngjajnë lilipute nën hijen e krimeve monumentale që u kryen gjatë kohës kur Nexhmija me të shoq sundonin shqiptarët.
Pyetjet që mungojnë, të cilave Nexhmije Hoxha nuk do të denjonte t’u përgjgijej gjithsesi, janë ato mbi vrasjet, burgosjet, torturat dhe shuarjet me fis e me farë të mijëra të pafajshmëve, qindra intelektualëve, klerikëve dhe patriotëve që nuk ishin me Partinë Komuniste. Mjaft të lexosh At Zef Pllumin për të kuptuar sa e tmerrshme ishte ajo që shqiptarët u bënë shqiptarëve pas luftës. Dhe kush nuk lexon dëshmitë e viktimave, natyrisht mund të ngopet e të krijojë bindje të gabuara me rrenat romantike të Nexhmijes.
Edhe 7 vjet më parë, intervista që Xhunga i mori Nexhmijes për emisionin Shqip(link is external) shkaktoi pakënaqësi. Kjo ndoshta, sepse ka një lapsus logjik kur xhelati pikturon portretin e tij historik, dhe viktimat detyrohen të dëgjojnë. Jam i sigurtë se Nexhmija e njeh veten për njeri të mirë, edhe Enveri i saj është një shenjt, kjo bindje e të qenit i/e mirë ndodh edhe tek kriminelët më të përbindshëm. Të gjithë jemi të sigurtë se në thelb, nuk ka si ne.
Problemi që shoh se është prezent vazhdimisht në mediat shqiptare, sidomos në shtypin e shkruar që me rregullsi të frikshme risjell në faqet e para, të ashtuquajturat “dossier” ku mund të lexohet mbi ato që Enveri i tha Mehmetit për Kadriun e ç’bëri ky kur ai i tha ashtu etj si këto, shkrime pa vlerë, që përveçse shtojnë tymnajën që mbulon historinë, i imponojnë shqiptarëve të lindur në vitet 2000 figurat e portretetet e politbyrosë.
Lajm i fundit: Njeriu po kolonizon Marsin. Makinat pa shoferë janë një realitet. Uji i detit mund të bëhet i pijshëm. Organet njerëzore mund të printohen në 3D… Media, dil nga bunkeri i Bllokut, eja në shekullin XXI.
/peshkupauje.com/
