Kryetarja e Komisionit Hetimor për Inceneratorët, Jorida Tabaku tha se nesër do të merren në pyetje 3 administatorët e inceneratorëve të Tiranës, Elbasanit dhe të Fierit.
“Dëshmitarët e parë janë 3 administatorët. Dëshira jonë do të ishte që të ishin 3 pronarët, që janë në kërkim. Nëse nuk paraqiten, me të gjithë forcën që me jep ligji, me Policinë e Shtetit do ta zbatojnë procedurën. Kushdo që i del në mbrojtje abuzimit, jemi të hapur që t’i çojmë para drejtësisë.”, pohoi ajo.
Tabaku po ashtu vendosi në dukje faktin që afera që nis me 90 milionë euro dhe përfundon me 430 milionë euro, tregon që të gjithë ministrat e përfshirë në këtë procedurë, nga Koka, Ahmetaj e deri te Rama dhe Veliaj janë të përfshirë në vendimmarrje.
“Në të tre kontratat përveçse janë procedura korruptive, kosto është shumëfishuar, ka shumë shkelje. Ne nga nesër do fillojmë me pyetjen e dëshmitarëve. Qytetarët kanë paguar për incenerimin. Edhe para një viti e njëjta pamje ka qenë, një punonjës që thoshte: Për 30 ditë kolaudohet! Pyetja është ku kanë shkuar paratë?”, shprehet Tabaku.
