Kryeministri i Kosovës, Ramush Haradinaj në një konferencë për shtyp pas mbledhjes së qeverisë, ka paralajmëruar se taksa për mallrat serbe në rast se do të prishet koalicioni, do të vijojë të qëndrojë deri në verë.
“Sa i përket prishjes së koalicionit dhe shkuarjes në zgjedhje i bie që taksa të mbetet deri në qershor. Sepse nëse shpallen zgjedhjet i bie nja 45 ditë deri sa të mbahen, derisa të krijohet parlamenti dhe 30 ditë tjera, kështu që hyjmë në verë. Bëhuni gati se në verë do të hyjmë me taksë”, ka thënë Haradinaj.
Qeveria e Kosovës është në ngërç, ndërsa pritet që PDK-ja e drejtuar nga Kadri Veseli të dalë nga koalicioni.
I pyetur se çfarë raportesh ka me LDK-në dhe Lëvizjen VETËVENDOSJE!, ai tha: “Kam komunikim dhe me LDK dhe me VV. Nëse njëra nga kushtet që kam nxjerr unë më prish me dikë nuk ka dert, du me ndejt mirë me të drejtën time. Nëse dikush ka problem me kërkesat që kam vendos atëherë jemi të prisht apriori, nuk kam arsye me hap veten më”.
