Nga Erges Eskiu
Gjithmonë ka mundësi për t’i dhënë zgjidhje çdo situate me edukim, pa ndëshkim, nëse duam vertetë të zgjidhim dhe edukojmë pa mendësi ndëshkimi!
Si bëhet kjo? Padiskutim duke menduar pozitivisht, duke motivuar çdo burim të mendojë për alternativa të shëndetshme për popullatën.
Së pari, duhet e gjithë vëmendja tek mjekët, personeli mjekësor dhe profesionistët e tjerë si ekonomist, psikolog, ekspert të sigurisë etj. Kryeministri duhet të heq dorë nga daljet publike dhe përvetësimi, ose maximizimi i vëmendjes së publikut. Kjo është situatë e vështirë e cila zgjidhet me profesionistë, jo me politikë. Nëse propaganda qeveritare nxjerr ministrat të këpusin broçkulla të dirigjuara nga lart dhe kryeministri del me thonj pa prerë (me qëllim), jep vendime të pastudiuara dhe ben kllounin nëpër ekrane, krijohet shpërqendrim në publik dhe popullata nuk është e përqendruar 100% tek mesazhet e profesionistëve, por merret edhe me show-n qeveritar, humorin tallës, që shkakton qeveria apo është i nxitur prej veprimeve të saj.
Kjo sjellë rrjedhimisht humbjen e rëndësisë së mesazhit të profesionistëve, popullata rrjedhimisht e humbet seriozitetin dhe fokusin nga ç’ështja sepse merret me propagandën dhe bën që të kemi keqmanaxhim të situatës.
Së dyti shteti duhet të qetësoj popullatën se ushqimet nuk do mbarohen asnjëherë në markete ndaj nuk ka nevojë të rendni me vrap për të mbushur shtëpiat me ushqime dhe tet krijojnë rradhë të gjata nëpër markete ose grumbullime të panevojshme dhe institucionet e shërbimit të qytetarëve dhe bisneset duhet të vendosin rradhën me numra dhe mbajtjen e distancës minimale për mos-përhapjen e virusit, kështu njerëzit nuk do ziheshin në radhë dhe nuk ka nevoje për ndëshkime.
Së treti është shumë e rëndësishme të informohet vazhdimisht popullata nëpërmjet RTSH ose edhe mediave private për këshillat, që duhen ndjekur në çdo lloj situate.
Së katërti duhet të hiqet fasha orare pasi krijohet në mënyrë automatike grumbullimi masiv i njerëzve para marketeve ose bankave, por dalja duhet të jetë e kontrolluar me autorizim dhe në rastet pamundesisë së menaxhimit nga ana e policisë të grumbullimeve masive mund të përdoret ushtria, pa armë në krahë.
Së pesti duhen ndihmuar bisneset në lidhje me pagat dhe sigurimet e punonjësve pasi kjo do të rrezikonte falimentimin dhe mbylljen shumë bisneseve të vogla, por ndoshta edhe të mëdha. Ekspertët e opozitës thonë se për bisnesin e vogël nevojiten 25 milion euro/muaj dhe në total për daljen nga kriza nevojiten 90 milion euro/muaj diçka shumë e mundur për vendin tonë .
Së gjashti duke i garantuar shtresave në nevojë një pagesë minimale prej 200€/muaj për frymë me kushtin, që ata të mos thyejnë rregullat e përcaktuara nga profesionistët e shëndetit.
Së shtati transparencën për marrjen e vendimeve, që bën qeveria në lidhje me krizën e shkaktuar nga Covid-19.
Personalisht mendoj dhe besoj se nuk ka as edhe një grimcë morali për të ndëshkuar popullatën dhe trumbetuar gjoba e burg, kur Ti nuk i ke garantuar as edhe një siguri popullatës, që virusi të mos hyjë, nuk i jep shërbim, nuk i jep kujdes, nuk e mbështet për të përballuar krizën.
Nuk e ka fajin populli shqiptar, e ka fajin qeveria. Një popull që ka vuajtur prej dhunës së diktaturës, ta ndëshkosh apo dhunosh serish i bën veç dëme! Nëse nuk di ta edukosh popullin, nëse nuk ke durim ta edukosh, ik! Largohu! Hap krahun, s’ta kemi për borxh dhunën dhe krizën e urisë!
