Nga Ahmet Zani
Torta me mbishkrimin “Nëna Gëzuar 100 vjetorin!” i solli më shumë forcë Dila Baçukut, zonjës nga fshati Fushë-Mamurras i Kurbinit.
Gjoni 75 vjeçar, bashkëshortja e tij Martinja, nipërit dhe mbesat vendosën të festonin me të afërmit në këtë 100 vjetor për nëna Dilën.
“Nëna ime, Dila si dhe gjithë gratë e fshatit tonë, kanë përjetuar mjaft vuajtje nga punët e rënda në bujqësi”, thotë djali i madh i saj Gjoni.
Sekreti i jetëgjatësisë së saj është konsumimi i ushqimeve bio, kurse qumështi mbetet mjaft i preferuar për të moshuarën. Dila prej pesë vitesh është e paralizuar, por ajo gjen forcën shpirtërore të bëjë përpara, ndërsa dëgjon mirë dhe ka shkimin e duhur. Megjithëse është një shekullore ajo me duart e saj vendos perin ne vrimën e gjilpërës. Ushqehet mirë me qumështin e lopës së saj dhe preferon vetëm pak rakinë e fshatit, në mbrëmje.
Dila vetë kujton se gjatë jetës shpesh u mungonin barnat për mjekime, ndaj përdornim vaj akrepi, i përpunuar në mënyrë artizanale. Dila u ka shërbyer mjaft bashkëfshatarëve nga kjo lloj kure për disa lloje sëmundjesh.
Nëna Dila ndjehet e lumtur, teksa fëmijët, nipërit dhe mbesat që e rrethojnë punojnë dhe jetojnë në Shqipëri, pa u larguar asnjëri jashtë vendit.
