Pavarësisht se 4 ditë më parë deklaroi se nevojat konsumatore për energji do të plotësohen nga prodhimi në Kaskadën e Drinit, Korporata Elektronergjetike Shqiptare ka blerë 15,624 Mwh, ndërsa tenderi është zhvilluar në një nga ditët kur çmimi në bursa arriti nivele rekord. Sipas të dhënave nga KESH, në total për këtë blerje janë shpenzuar 7.62 mln euro, ndërsa energjia do të lëvrohet në datat 20 dhe 21 gusht.
Në datën 12 gusht KESH hapi një procedurë për blerjen e energjisë, por 1 ditë më pas ajo u anulua, ndërkohë që në një pronocim për TV SCAN ky dikaster deklaroi se shkak ishte rritja e çmimeve në tregjet ndërkombëatre. “Kjo javë, për shkak të ri-rritjes së temperaturave dhe daljes në remont të disa impianteve në Evropë pati një rritje te menjëhershme te çmimeve. Për këtë arsye procedura u anullua dhe do mbulohet konsumi me prodhimin vendas”, – deklaroi KESH, para 4 ditësh.
Por ndryshe nga këto deklarata, jo vetëm që nevojat nuk janë plotësuar nga prodhimi vendas, por blerja e fundit është kryer në një kohë kur në bursën e Hungarisë, që shërben si referencë për Shqipërinë çcmimet arritën nivelet më të lartë për gushtin. Çmimi mesatar në ditën e blerjes së fundit nga KESH arriti në 563.48 euro/MWH, ndërkohë që në datën 12 gusht ishte 457.09 euro/Mwh, apo rreth 100 euro/Mwh më pak.
Me blerjen e fundit, shpenzimet për blerje energjie për këtë vit arrijnë në 243.22 mln euro. Paralelisht, niveli në liqenin e Fierzës përgjatë 6 muajve të parë të vitit ka qenë nën mesataren historike, ndërkohë që edhe gjatë gushtit tendenca është në rënie, duke qenë se në datën 15 gusht niveli ishte 278.62 m, nga 281.48 m që ishtë ne fillim të këtij muaji.
Ola Mitre / SCAN
