Kryeministri Edi Rama iu është përgjigjur kritikave për nderimin e Florian Markut, në një ceremoni pritëse që ka mbajtur në Kryeministri, duke përdorur të njëjtën mënyrë nderimi si me Luiza Gegën që u shpall kampione europe.
Gjithashtu, Rama shfrytëzoi ceremoninë që ti përgjigjej të gjithë atyre të cilët thanë se qeveria kërkon të përfitojë nga suksesi i Gegës, duke thënë se sipas tij kjo nuk ishte e vërtetë.
Marku është nderuar në këtë ceremoni me medaljen “Yllin e Madh të Mirënjohjes Publike”, ndërkohë që sipas Ramës për Luiza Gegën është dhënë medalja e “Kordonit të madh”, e cila më herët iu është dorëzuar vetëm personaliteteve të larta.
“Përshëndetje edhe faleminderit për praninë, në fakt rastësia e deshi, që në të mblidhemi dy herë në një kohë të shkurtër, për të celebruar suksesin në sport, mes një kampione europe, Luiza Gegës, dhe një kampioni si Floriani që po e ngjit drejt majës flamurin kombëtar. Suksesi i jashtëzakonshëm i Luiza Gegës krijoi një konsensus të çuditshëm gëzimi, të përzierë me një ndarje të pakuptueshme në rastin konkret, shumëkush nuk e la dot gëzimin pa e përzjerë me fjalë pa vend, pa lidhje, sipas të cilave Luiza ishte e braktisur, e syrgjynosur deri në Kenia, për shkak se ka vrapuar vetëm, natyrisht për fajin e qeverisë sipas tyre. Të tjerë u përpoqën të thonë se nderimi që ne i bëmë Luizës ishte një përpjekje që ne të merrnim pjesë në suksesin e saj, nuk është e vërtetë që Luiza ka vrapuar vetëm, edhe pse suksesi padiskutim është vetëm i saj. Po të mos kishim bërë asnjë pritje, po këta njerëz do të thonin që e shpërfillëm, ne do të vrapojmë më shpejt, dhe të mos humbasim kohë me njerëzit negativë. Pak a shumë diçka e ngjashme ndodhi me Florianin, duke rifilluar avazin po njësoj, ndërkohë që ne sot jemi këtu për të celebruar një histori jetësore, të ngjashme të qindramijëra shqiptarëve, që janë marrë prej dore nga prindërit në emigracion, dhe bëjnë sukses. Suksesi i Florianit është një sukses që bën lajm, është një sukses kuqezi, ne nuk jemi këtu për të bërë krahasime, në aspektin ceremonial ne e kemi bërë dallimin, ne e kemi nderuar Luizën me koordonin e madh, më i larti në shkallën e vlerësimeve, që ju takon personaliteteve shumë të larta politike apo shoqërore. Floriani është ambasador shqiptar në Britaninë e Madhe”, tha Rama.
