Bordi i krijuar me vendim qeverie për caktimin e çmimit të tregtimit karburanteve, ka vendosur sot në mënyrë të papritur që të rrisë çmimin e tyre.
Sipas vendimit të bordit, një litër naftë do të tregtohet me 208 lekë për litër, nga 199 lekë që është sot, ose 9 lekë për litër më shtrenjtë.
Benzina rritet në 189 lekë për litër, ndërsa gazi do të tregtohet me 71 lekë/Litri.
Vendimi, që hynë në fuqi nga ora 18:00 e kësaj të Marte, vjen në një kohë që nafta në bursa është në nivelet më të ulëta nga tetori i vitit 2021.
Që prej marsit të vitit 2022, çmimet tavan të naftës vendosen nga “Bordi i Transparencës” i krijuar nga qeveria me synimin për të kontrolluar rritjen e fortë të karburanteve që erdhi pas sulmit të Rusisë ndaj Ukrainës. Por, deri tani ndërhyrjen e Bordit vetëm sa kanë mbajtur lart çmimin.
Operatorët e tregut pohojnë për mediat se nëse bordi nuk do të ndërhynte, çmimet do të ishin të paktën 5% më lirë, pasi kompanitë do të ishin fleksibël të merrnin vetë përsipër rrezikun dhe të blinin më shumë sasi kur çmimi të ishte më i lirë në tregje, ndërsa tani janë të detyruar të bëjnë blerje në baza ditore për shkak të ndërhyrjeve të bordit.
