Ndahet nga jeta në moshën 99 vjeçare ish-kryeministri grek Konstantinos Mitsotakis.
Sipas një deklarate të familjarëve Mitsotakis ka humbur jetën në orët e para të mëngjesit të së hënës.
I lindur në vitin 1918 në një familje politikanësh, në Hania të Kretës, veprimtaria e tij politike kishte nisur në vitin 1946, kur u zgjodh për herë të parë deputet me Partinë e Liberalëve të Venizellosit.
Me fillimin e juntës ushtarake në prill 1967, arrestohet për disa muaj dhe pasi lirohet, largohet në Francë, për tu kthyer në vitin 1973.
Më 1978 hyri në radhët e Demokracisë së Re. Më 1984 zgjidhet lider i Partisë Konservatore, ndërsa në vitin 1990 kryeministër i Greqisë, deri në 1993, kur pasi humb zgjedhjet, jep dorëheqjen.
Konstantinos Mitsotakis u largua nga jeta politike në vitin 2004, pas 58 vitesh në Parlament.
