Sekretari i Përgjithshëm i Partisë së Lirisë (PL), Tedi Blushi, ka reaguar pas dëbimit me forcë të gazetarit të News24 nga takimi elektoral i Belinda Ballukut në Bulqizë, si dhe tentativës së truprojës së saj për ta goditur atë.
Në një reagim të bërë në Facebook, Blushi shprehet se duhet të ndalet dhuna kriminale ndaj gazetarëve, ndërsa i bën thirrje autoriteteve që të reagojnë dhe të ndëshkojnë autorin.
Reagimi i plotë:
Ndal dhunës kriminale ndaj gazetarëve!
I telefonova gazetarit kurajoz të News 24, kolegut të nderuar, z.Enver Doçi për t’i shprehur të gjithë solidaritetin dhe mbështetjen, pas dhunës që u ushtrua sot në Bulqizë ndaj tij, në krye të detyrës, nga truproja i Zv/Kryeministres Balluku!
Nuk është hera e parë që ndaj kolegut Doçi ushtrohet dhunë nga banditë me uniformë! Ndaj bëj thirrje drejtësisë që frymëzuesit dhe autori i dhunës të marrë ndëshkimin e merituar ligjor!
Kjo ngjarje shumë e rëndë, ndodh vetëm pak ditë pasi “Reporterët Pa Kufij” e renditën Shqipërinë të fundit në rajon për lirinë e medias dhe dhanë alarmin për kushtet shumë të rënda në të cilat punojnë reporterët tanë.
Një regjim i ngritur mbi propagandën, mashtrimin, censurën, në “lajmet” me “kaseta dhe montazhe të gatshme”, që hedh në erë me tritol bizneset e pronarëve të mediave, mbyll televizionet dhe i ble të tjerat me paratë e korrupsionit, nuk është gjë tjetër veçse armik i fjalës së lirisë, i transparencës dhe demokracisë!
Ndaj më 14 Maj është dita për Ndëshkim!/BW
