Aleanca e Atlantikut të Veriut (NATO) është mbledhur sot në Bruksel pas zhvillimeve të fundit në Lindjen e Mesme.
Vendet anëtare të Aleancës kanë diskutuar lidhur me qëndrimin që do të mbajnë pas tensioneve në rritje mes Iranit dhe Shteteve të Bashkuara, të cilat kanë arritur pikën kritike pasi me urdhër të presidentit amerikan Donald Trump, forcat amerikane ekzekutuan me dron gjeneralin e lartë iranian Kasem Soleimani, i konsideruar si njeriu i dytë më i pushtetshëm në republikën islamike.
Në përfundim të takimit të NATO, Sekretari i Përgjithshëm Jens Stoltenberg tha se Aleanca është e vendosur në luftën kundër ISIS dhe në misionin në Irak. Ai bëri thirrje për de-eskalim të tensioneve mes Iranit dhe SHBA.
“Aleatët bënë thirrje në takimin e sotëm për përmbajtje dhe mos përshkallëzim të situatës. Një konflikt i ri nuk do të ishte në interes të askujt. Kështu që Irani duhet të përmbahet nga dhuna dhe provokimet e mëtejshme”, deklaroi shefi i NATO, Stoltenberg.
