Petromanas do shesë 75 për qind të aksioneve për 45 milionë dollarë
Zona naftëmbajtëse e Shpiragut do të kalojë në duart e kompanisë Shell. Mbajtësi deri më tani i 75 për qind të aksioneve të kësaj pasurie kompania Petromanas Energy ka vendosur t’i shesë ato për 45 milionë dollarë. Marrëveshja pritet të nënshkruhet brenda muajin mars.
Kompania Shell, e cila më parë kishte 25 për qind të aksioneve në këtë aktivitet në Shqipëri, tashmë bëhet pronare e 100 për qind të aksioneve. Petromanas Albania dhe Shell kanë një kontratë të përbashkët me qeverinë për shfrytëzimin e bllokut të quajtur Blloku 2-3 PSC, pjesë e të cilit janë edhe puset Shpiragut-2 dhe Molisht-1.
Në dhjetor të vitit 2013, Agjencia Kombëtare e Hidrokarbureve njoftoi se pas 4 vjet kërkime në Blloqet Shpiragu 2 dhe 3, kompania Royal Dutch Shell dhe kompania Petromanas Energy njoftuan rezultate pozitive në testet e pusit Shpiragu-2. Ky zbulim ngjalli interesin e shumë kompanive për të eksploruar për naftë në Shqipëri. Aktualisht qeveria ka nxjerrë në shitje 13 blloqe nafte në vende të ndryshme të Shqipërisë. Në korrik 2015, Shell i është përgjigjur ftesës së qeverisë shqiptare për të zhvilluar nxjerrjen e naftës në blloqet e paaktivizuara ende kryesisht në zonën e Dumresë.
