Banorët e zonës së Porto Romanos kanë protestuar sërish sot në lidhje me rrezikshmërinë që paraqit fabrika e mbushjes së bombolave të vogla të gazit. Protesta e banorëve është zhvendosur sot para shkollës 9-vjecare Met Hasa, ku i kanë kërkuar drejtorit të shkollës Hajri Nuh të pezullonte mësimin pasi fëmijët rrezikohen nga ndonjë shpërthim i mundshëm.
“Kërkojmë të mbyllet shkolla pasi fëmijët rrezikohen. Jemi shumë të frikësuar. Edhe fëmijët janë të tmerruar. Nuk e kuptojmë se si nuk merren masa. Aty është skenë krimi dhe vazhdon puna normalisht. Kjo s’ka kuptim. Këtu bëhet fjalë për rrezik jete. Ne nuk do t’i lejojmë fëmijët të vijnë në shkollë. Nëse nuk zhvendoset fabrika ne do përshkallëzojmë protestat, do bllokojmë rrugët“, deklaruan banorët.
Kujtojmë se dy ditë më parë, banorët e zonës së Porto Romanos u tmerruan nga një shpërthim i fortë në fabrikën e gazit “GazPower”, e cila është shumë pranë banesave. Thuhet se fabrika që ka pësuar defektin me rrjedhje e gazit është kompania “Elka”. Kjo nuk ishte hera e parë që qytetarët u ndjenë të rrezikuar nga fabrika “GazPower”, ku prodhohen bombola gazi të të gjitha madhësive. Pak kohë më parë, shumë banorë në atë zonë i braktisën shtëpitë, pasi ndiheshin të rrezikuar nga shpërthimet e njëpasnjëshme.
