Urdhri i Meritës së Republikës Federale është vlerësimi më i lartë që Gjermania akordon për merita të veçanta
President i Gjermanisë, Joachim Gauck, ka dekoruar me urdhrin më të lartë, motrat bamirëse të Misionit “Shën Jozefi” në qytetin e Fushë Arrëzit, Gratias Ruf dhe Bernadette Ebenhoch. Presidenti gjerman akordoi për dy murgeshat bamirëse, Urdhrin e Meritës së Republikës Federale, më i larti që jepet në Gjermani.
Ceremonia e dorëzimit të këtij titulli akorduar murgeshave gjermane që ndihmojnë të varfrit në Shqipërinë e Veriut u organizua në Ambasadën gjermane në Tiranë, ku ambasadorja Susanne Schütz vlerësoj misionin e dy murgeshave gjermane të cilat ndihmojnë prej 25 vitesh të varfrit pa dallime fetare.
“Me angazhimin e tyre të palodhur ato kanë vënë shumëçka në lëvizje, dhe kanë përmirësuar në mënyrë mjaft konkrete jetën e njerëzve në dhe përreth Fushë-Arrëzit. Urdhri i Meritës së Republikës Federale të Gjermanisë nderon angazhimin e tyre të jashtëzakonshëm shumëvjeçar në Shqipëri. Unë ju përgëzoj shumë përzemërsisht për këtë vlerësim”, u shpreh ambasadorja Susanne Schütz gjatë dorëzimit të Urdhrit.
Vete moter Gratias dhe Bernadet teksa ndjeheshin të nderuara këtë titull dhe nderimin ndaj tyre ja dedikuan Zotit që i ka udhëhequr në ndihmë të familjeve të varfra. Misionaret gjermane punojnë që prej vitit 1995 në mënyrë vullnetare në Stacionin e Misionit Katolik në Fushë Arrëz në veri të Shqipërisë duke u angazhuar fort në përmirësimin e kushteve të jetesës së banorëve.
Trajtimi me miell dhe ushqime të përmuajshme, medikamentet për të sëmurët, ndërtimi i afro 250 banesave, ndihma për grat e dhunuara, kurset profesionale në ndihmë të popullsisë së kësaj zone, bursat për studentet nga familje të varfra si dhe kopshti i fëmijëve janë vetëm një pjesë e aktivitetit të tyre bamirës.
