Ja tekstet që janë gati në libraritë, ku do të shiten librat shkollorë këtë shtator
Abetarja e klasës së parë nuk është ende nëpër libraritë që janë caktuar të shesin tekstet shkollore. Ka një sërë tekstesh të tjera që mungojnë nëpër librari, ndër të cilat krejt librat e klasës së dhjetë.
Tek libraria në zonën “Ushtari i Panjohur” në Tiranë (një librari ku shiten tekstet shkollore) 27.al ishte sot pranë kësaj librarie për të parë nga afër cilat tekste mungojnë. E para, është Abetarja e klasës së parë. Ky tekst nuk ka mbërrritur ende nëpër libraritë që kanë nisur të shesin ato tekste që janë gati. Punonjësit e librarisë ngurrojnë të japin informacione edhe nëse shkon si qytetar i thjeshtë i interesuar për të pyetur për tekstet shkollore. “Pse na pyet?, kush të ka çuar?, pse interesohesh?, shih çfarë tekstesh janë në vitrinë e mos na pyet ne…”, e të tjera reagime si këto, vijnë nga punonjësit e librarive nëpër Tiranë.
27.al ka fotografuar tekstet që janë gati nëpër librarirë e Tiranës, ndërsa të tjerat mungojnë akoma. Dhe nga lista duket se këto tekste janë dispozicion për fëmijët sot më 1 shtator: Ekonomia 12, Kimia 11, Informatika 9, Psikologjia 11, Biologjia 9, Historia 12, Edukimi për karrierën 12, Gjeografia 11, Anglisht Access 1, Anglisht Access 4. Ndërsa një ndër ato që mungojnë është edhe Abetarja. Nëpër dyert e librarive vazhdojnë të vijnë e të largohen të zhgënjyer fëmijët që do të nisin klasën e parë. Ata nxitojnë më shumë për të marrë tekstet e tyre, pasi nisin për herë të parë shkollën. Nuk dihet ende edhe sa ditë do të duhet të bëjën rrugën për tek libraria, pasi nuk ka një datë të saktë kur do të vijë teksti i Abetares, edhe pse është shtypur nga shtëpitë botuese, por mungon pulla e sigurisë, e cila do të duhej të ishte siguruar javë më parë. Ministria e Arsimit ka organizuar me vonesë tenderin për prodhimin e pullave të sigurisë, i cili po mban peng ndarjen e teksteve shkollore. Ministria ka publikuar si afat të ndarjes së teksteve shkollore datën 25 gusht deri më 12 shtator. Por, deri tani në treg mungojnë shumica e teksteve shkollore.
