Një ngjarje e rëndë është shënuar ditën e djeshme në Komisariatin e Kavajës, ku i riu Ilvi Meta, u vetëvra. Familjarët e tij kanë dyshime se ai mund të jetë vrarë pasi ai nuk kishte shfaqur kurrë shenja depresioni që të ndërmerrte një akt të tillë.
Motra e tij Irena ka dhënë një deklaratë të fortë mbrëmjen e sotme për emisionin “Top Story”, ku është shprehur se herën e parafundit që u shoqërua në polici është shoqëruar nga një efektiv policie dhe se vëllai nuk i kishte treguar se cili polic e kishte kërcënuar.
“Për dy ditë do kalonte në Greqi, Kohët e fundit ka marrë një kërcënim nga një punonjës policie. Kur u arrestua herën e parafundit ishte një armë lodër, e kanë mbajtur dy orë. Një polic që e kishte inat i thoshte këtë herë më ike por do vijë dita që do më biesh në dorë. Që aty e dy viteve nuk ka pasur asnjë problem.”
Kujtojmë se, 31-vjeçari po mbahej në paraburgim me akuzën e vjedhjes dhe sipas policisë, i ka dhënë fund jetës duke përdorur lidhësen e kapuçit.
Nga hetimet e para, dyshohet se Meta ka përdorur hekurat në dhomën e sigurisë për të varur veten. Avokatja e Popullit thotë se vendosja e hekurave horizontalë mbi lartësinë 60 cm nuk lejohet në bazë të rregullores.
