Lituani ka bllokuar mallrat e sanksionuara nga BE që të arrinin në enklavën ruse të Kaliningradit, çka ka bërë që Moska të kërcënoi vendin e NATO-s.
Në deklaratën e tij Kremlini ka paralajmëruar për veprime shumë të ashpra kundër Lituanisë pasi bllokoi dërgesat e qymyrit, metaleve, materialeve të ndërtimit dhe teknologjisë së avancuar që të hyjnë në territorin rus, duke nxitur frikën e një përshkallëzimi të luftës në Ukrainë.
“Ne konsiderojmë provokim nga ana e palës lituaneze që shkelin detyrimet ligjore ndërkombëtare të Lituanisë, kryesisht Deklarata e Përbashkët e Federatës Ruse dhe Bashkimit Evropian të vitit 2002 mbi transitin midis rajonit të Kaliningradit dhe pjesës tjetër të Federatës Ruse”, thuhet në deklaratën e Moskës.
Senatori Andrey Klimov paralajmëroi se ky ishte agresion i drejtpërdrejtë kundër Rusisë.
Kreu i komisionit parlamentar për mbrojtjen e sovranitetit, u zotua se Rusia do ta zgjidhë bllokadën në çfarëdo mënyre.
Çdo sulm i drejtpërdrejtë rus ndaj shtetit anëtar të aleancës, Lituanisë, do të shihej si një akt lufte kundër NATO-s dhe mund të ndezë një luftë botërore.
Ministri i Jashtëm lituanez Gabrielius Landsbergis tha se vendi i tij thjesht po zbatonte sanksionet e vendosura nga BE.
Ai tha se masat e zbatuara janë marrë pas ‘konsultimit me Komisionin Evropian dhe sipas udhëzimeve të tij.
