Rekordi: Drejtuesit e Bankers paga deri 1 milion dollarë në vit
Revista e njohur ekonomike në vend Monitor ka sjellë në një shkrim eskluziv kompanitë që I paguajnë më shumë drejtuesit e specialistët e vet. Rekordi mbahet nga kompania e naftës Bankers Petroleum, drejtuesit e të cilës kanë paga që shkojnë mbi 80 mijë euro në muaj apo e shprehur ndryshe mbi 1 milion dollarë në vit. Në shkrimin e revistës thuhet “Inxhinierët e prodhimit të naftës, janë profesionistët që paguhen më mirë sot në vend. Pagat e tyre shkojnë nga 30 deri në 70 mijë euro në muaj. Por, mos u habisni kot! Janë të paktë ata që marrin këto të ardhura marramendëse për nivelin shqiptar dhe për më tepër, janë të huaj. Ndërsa pagat për personelin shqiptar në industrinë e naftës, ndonëse të larta, janë në nivele normale. Nga përpunimi i të dhënave që Monitor ka bërë është hartuar një tabelë me 100 kompanitë më të mëdha sipas fondeve të pagave.
Nga 4 kompanitë që paguajnë paga marramendëse tre i takojnë sektorit të naftës. E para është
Phoenix Technology Services Albania, një nënkontraktor për hapjen e puseve të naftës, për llogari të Bankers. Mesatarisht kjo kompani jep gati 10 mijë euro në muaj për punonjës. Vetë Bankers Petroleum, koncesionari më i madh i naftës në vend, renditet e dyta. Kompania raporton 27 milionë euro pagan ë vit. Paga mesatare për punonjës i bie të jetë 4000 euro në muaj. Por, kjo mesatare fsheh faktin se 76 për qind e këtij fondi shkon për personelin e huaj. Për personelin shqiptar, paga mesatare rezulton rreth 1200 euro në muaj. Lista me pas vijon me Simmons Edeco Limited, Dega në Shqipëri, një tjetër nënkontraktor i Bankers. Në vend të katërt jo pa befasi është Albcontrol,një shoqëri anonime me kapital shtetëror, ku paga mesatare rreth 2250 euro në muaj. Në përpjekje për të mbajtur specialistët më të mirë, Banka e Shqipërisë rezulton se i trajton mjaft mirë punonjësit e saj. Paga mesatare e punonjësve të saj gati 1300 euro në muaj. Në këto nivele janë edhe pagat e bankave tregtare ku punonjësit fillestarë nisin me mesatarisht 400 euro në muaj, për të arritur tek drejtuesit që kanë paga mbi 20 mijë euro në muaj. Zhvillimi i spitaleve private ka qenë një mundësi e mirë punësimi për mjekët, që paguhen disa herë më shumë se në shtet dhe që marrin paga mesatare bruto rreth 1000 euro në muaj. Të këtyre niveleve rezultojnë të jenë edhe pagat e sektorit telekomunikacioneve.
Shkrimi i plotë në: http://www.monitor.al/ekskluzive-kompanite-pagat-te-larta-ne-shqiperi/
