Opozita kosovare ka mbledhur firmat për një mocion mosbesimi për qeverinë e Isa Mustafës, kabinet i dalë nga një marrëveshje paszgjedhore e vitit 2014 mes Lidhjes Demokratike të Kosovës dhe Partisë Demokratike të Kosovës, të drejtuar në atë kohë nga Hashim Thaçi.
Në listën me 42 firma që u dorëzua sot në Kuvendin e Kosovës, janë dhe emrat e disa deputetëve të PDK-së. Në kërkesë argumentohet se kjo qeveri duhet të rrëzohet për shkak se ka dështuar në zbatimin e programit qeverisës dhe se koalicioni qeveritar shpesh nuk i ka patur votat për të kaluar ligje të rëndësishme.
Brenda pak ditësh, Kuvendi i Kosovës duhet të mblidhet në një seancë për të hedhur në votim mocionin e mosbesimit, të cilit i duhen 61 vota për t’u miratuar. Nëse kjo ndodh, Kosova shkon në zgjedhje të parakohshme.
