Nga Rei Morina
Në plazhin e Divjakës, kur pyet sot mbi fatin e 338 kabinave të tij njërëzit ngrenë supet. Disa të thonë që pas tyre fshihet një histori e mistershme korrupsioni.Të tjerë i bien shkurt duke të thënë se “ato punë i di Bashkia”. Ka edhe nga ata që nuk preferojnë të komentojnë duke u mjaftuar me fjalinë “punë pushtëtarësh”. Askush nuk di të thotë më shumë përveç faktit se ato u takojnë tani pronarëve që vijnë nga larg, nga qytete të tjerë, me para të madhe dhe të lidhur me afera.
Historia e 338 kabinave nis në verën e vitit 2010, kur bashkia e kohës me kryetar Irakli Gorenë përmes një kontrate të dyshimtë konçesionare i kalon ato në pronësi të qiramarrësve, të cilët pretendonin dhe premtonin mirëmbajtjen dhe rritjen e standarteve në shërbim të pushuesve vendas dhe të huaj.
Për afro një vit me radhë qendra “Open doors” përmes projektit konçeskan ka arritur të zbulojë një sërë shkeljesh ligjore në lidhje me këtë kontratë. Nga hulumtimi i dokumentacionit rezulton se një vendim me nr. 499 i datës 19.07.2000 i Këshillit të Ministrave i quan këto kabina si pronë ekskluzive e Bashkisë Divjakë, çka do të thotë që ishte atribut i Këshillit Bashkiak për tjetërsimin ose jo të tyre, në zbatim të ligjit “Për organizimin dhe funksionimin e qeverisjes vendore”. Por, në 2010, pa dijeninë e Bashkisë dhe vetëm me dijeninë e kryetarit Gorea, Drejtoria e Administrimit dhe Shitjes së Pronave i kalon Kabinat, përmes një kontrate konçesionare në favor të individëve duke ua dhënë ato me qira. Gjithçka bëhet larg syrit të publikut, në fshehtësi dhe me shpejtësi të plotë, megjithëse këshilltarët e LSI, PS, PSD e PDK ngulën këmbë në bërjen e transparencës duke e akuzuar Gorenë se kabinat u janë dhënë personave që kanë lidhje familjare me të. Por, jo vetëm kaq; në Divjakë njerëzit të thonë se qiramarrësit jane nga qytete të tjera, nga Fieri e Lushnja, nga Tirana e Vlora, çka rezulton edhe në dokumentacionin shqyrtuar nga projekti konçeskan. Ekspertiza e ekspertëve të projektit arriti në përfunimin se i gjithë procesi i dhënies me qira dhe i privatizimit të kabinave shihet si i realizuar në mënyrë të paligjshme nga pushteti i vjetër vendor, çka cilësohet si një shkelje flagrante që meriton t’i japë zgjidhje një gjykatë administrative.
Pas kërkesës së “Open doors” në datë 18.102017, në lëvizje vihet edhe Kontrolli i Lartë i Shtetit, i cili ushtroi një auditim tematik, në përfundim të të cilit i rekomandoi kryetarit aktual të Bashkisë Divjakë zbatimin e masave me karakter organizativ, si dhe shpërblim dëmi. Në përfundim të projektit, ekspertët e qendrës arritën në konkluzionin se kontrata konçesionare ka pësuar ndryshime nga qiramarrja në privatizimin e tyre, për të cilat opinioni publik është tërësisht i painformuar.
Ata rekomanduan që të merren masa për informimin e opinionit publik mbi çdo ndryshim që ka pësuar kontrata nga qiramarrja në privatizim, ndërsa rekomandohet që organi administrativ të vendosë në vend drejtësinë ligjore duke iu drejtuar me padi gjykatës kompetente për të kërkuar pavlefshmëri të kontratës.
Shtatë vjet më pas të 338 kabinat e plazhit të Divjakës vijojnë të jenë të mbështjella me misterin e një kontrate që u bë larg syrit të publikut dhe që vijon të fshehë një aferë të pastër korrupsioni.
