Ministria e Punëve të Jashtme ka reaguar pas sulmit që iu bë sot Muzeut të alfabetit të gjuhës shqipe në Manastir të Maqedonisë. Ministria e Jashtme i kanë kërkuar autoriteteve të Maqedonisë zbardhjen sa më shpejt të këtij akti vandal si dhe dënimin e autorëve.
Përmes një deklarata për shtyp Ministria shprehet që “… Sulmet e përsëritura ndaj Muzeut janë dëshmi e kërkesës për mbrojtje më efektive të kësaj trashëgimie të përbashkët nga autoritetet kompetente. Besojmë se këto sulme janë veprime të një grupi të vogël njerëzish të nxitur nga ndjenjat nacionaliste ekstreme, frika, mungesa e informacionit dhe retorika e dëmshme e kohëve të fundit. Dëshirojmë të theksojmë se historia, tradita, gjuha e kultura e popullit shqiptar janë vlerë e shtuar për fqinjët tanë në Maqedoni dhe se ruajtja e tyre tregon vlerat më të larta demokratike e njerëzore” .
Më tej Ministria e Jashtme shqiptare i bën thirrje të gjitha palëve të ruajnë qetësinë dhe të ndalojnë retorikën kundër shqiptarëve, e cila vetëm sa shpërqendron vëmendjen nga problemet reale të vendit, dëmton marrëdhëniet ndëretnike në vend dhe rrugëtimin e saj euro-atlantik.
Gjithashtu Ministria i bën thirrje shqiptarëve në Maqedoni që të mos bien pre e provokimeve por të tregojnë qytetari e maturi dhe të ruajnë besimin se kriza në vend do të zgjidhet në të mirë të të gjithë qytetarëve të Maqedonisë.
http://27.al/maqedoni-huliganet-tentojne-ti-vene-flaken-muzeut-te-alfabetit-ne-gjuhen-shqipe/
