Shqipëria rrezikiohet të preket nga sëmundja “dermatoza nodulare e gjedhit”, ka njoftuar Ministria e Bujqësisë. Kjo sëmundje ka prekur disa vende të rajonit dhe rrezikon edhe Shqipërinë. Ministria, nga ana e saj ka marrë masa për bllokimin e importit të kafshëve të gjalla dhe mishit i cili e ka origjinën nga vendet e prekura nga kjo sëmundje.
Njoftimi i Ministrisë së Bujqësisë
Drejtoria e Shërbimit Veterinar në MBZHRAU, ju njofton për praninë e sëmundjes ‘’dermatoza nodulare e gjedhit” në disa shtete të rajonit si: Turqi, Maqedoni, Kosovë, Serbi, Bullgari dhe Greqi . Kjo sëmundje paraqet rrezikshmëri për përhapje dhe në vendin tonë. Sëmundja nuk paraqet rrezik për njerëzit.
MBZHRAU ka marrë masa për bllokimin e importit të kafshëve të gjalla dhe të mishit i cili e ka origjinën nga vendet e prekura nga kjo sëmundje.
Me urdhër të posaçëm të ministrit të Bujqësisë, Edmond Panariti, është ngritur një Task Forcë, e përbërë nga veterinerë dhe epidemologë për informimin, parandalimin dhe monitorimin e përhapjes së kësaj sëmundje.
Ministria e Bujqësisë i bën thirrje fermerëve të sinjalizojnë menjëherë çdo dyshim për prezencën e kësaj sëmundje pranë Drejtorive të Bujqësisë në të gjithë vendin, ose pranë Shërbimit Veterinar, në Ministrinë e Bujqësisë.
Ministria e Bujqësisë i ka kërkuar Këshillit të Ministrave, miratimin e një fondi emergjence për blerjen e vaksinës kundër kësaj sëmundje dhe mbetet në pritje të alokimit të këtij fondi.
