“Me ndihmësat e Kancelares Merkel biseduam për rrugën e integrimit të Shqipërisë në BE“
Ministri i Drejtësisë, Ylli Manjani gjatë vizitës zyrtare në Gjermani është takuar këshilltarët e Kancelares Merkel dhe personalitete të Bundestagut. Sipas një njoftimi të Ministrisë së Drejtësisë “Ecuria e procesit të reformës në drejtësi dhe menaxhimi i krizës së refugjatëve ishin në qendër të takimeve”. Po ashtu njoftohet se ministri Manjani kërkoi prezencë të Gjermanisë në zbatimin e ligjit, ndërsa lidhur me çështjen e refugjatëve, ai shprehu gatishmërinë e qeverisë shqiptare për të marrë pjesën që i takon.
Në përfundim të takimeve ministri Manjani ka folur për mediat. Ai ka deklaruar: “Premtimi që mora në Ministrinë e Drejtësisë së Gjermane, për më shumë prezencë të ekspertizës gjermane, të mentalitetit gjerman të kulturës gjermane në hartimin dhe zbatimi i ligjit, që mua m’u duk më i rëndësishmi dhe unë besoj se është ajo që Shqipëria ka nevojë në këtë çast”. Më tej Manjani u shpreh: “Unë jam i kënaqur që vizita ime e parë në hapësirën evropiane është në Berlin, sepse Berlini është kryeqyteti nëpërmjet të cilit ne do të duhet të anëtarësohemi sa më shpejt në Evropë. Që ta bëjmë këtë na duhet Berlini prezent në Shqipëri, na duhet që ta kemi sa më prezent në jetën tonë institucionale. Së dyti, në takimin që pata me ndihmesat e Kancelares Merkel. Kemi biseduar në detaje për rrugën e integrimit të Shqipërisë, kemi biseduar në detaje për mënyrë sesi do të administrohet miratimi dhe zbatimin e reformës në drejtësi. Mesazhet janë shumë të qartë dhe nuk ka kthim mbrapa. Në çdo kosto na duhet që të bëjmë një reformë të thellë, të qëndrueshme, që të flasë shqip me një mentalitet evropian, pse jo edhe në gjuhën gjermane, është një gjë shumë e këndshme dhe e domosdoshme”. “Konsensusi është fjala kyçe dhe u përmend në të gjitha takimet dhe nga kjo pikëpamje unë them se ne patëm shkëmbime dhe bisedime në një frymë bashkëpunimi dhe në një frymë mirëkuptimi. Në Bundestag biseduam për çështjen e krizës së refugjatëve dhe për rolin e Shqipërisë. I premtova në emër të qeverisë shqiptare dhe i shpjegova planin e kontigjencës që ne kemi bashkëpunim me ekspertët e BEsë se Shqipëria është e përgatitur dhe do të jetë në anën e zgjidhjes së problemit në anën e të gjithë vendeve të BEsë. Nga kjo pikëpamje ne ndjehemi pjese e BEsë dhe jemi të gatshëm që të marrim të gjithë përgjegjësitë për këtë pjesë. Në tërësi ishte një vizitë e suksesshme dhe patëm shumë shkëmbime pikëpamjesh. Patëm shkëmbime informacioni. Me interes ishin pyetjet që mu bënë në lidhje me procesin e reformës në drejtësi , për të cilat dhashë të gjitha shpjegimet e nevojshme dhe sipas gjithë kalendarit politik që ne kemi”, – mbyllet deklarata e bërë për mediat nga Ministri i Drejtësisë, Ylli Manjani.
