Me të gjetur një uniform tjetër, shumë prej ish-kuqezinjve kanë rilindur, duke qenë faktor suksesi tek skuadrat e reja
Tashmë duket gjithnjë e më qartë, që tek Milani shumë gjëra nuk shkojnë mirë dhe kjo reflekton edhe në fushën e lojës. Si është e mundur, që prej kohësh, kush e lë “Milanelon” menjëherë fillon të shprehë më së miri talentin e tij. Rasti i fundit është ai i Suso, i cili shpërtheu menjëherë sapo u huazua tek Xhenoa, pas disa muajsh që tek kuqezinjtë nuk bëri asgjë. Por ka edhe raste të tjera futbollistësh, të cilët pasi ishin pothuajse inekzistentë sezonin e kaluar nën drejtimin e Inzagit kanë rilindur me uniformat e reja. Fernando Tores do të luajë në finale e Champions League kundër Realit, ndërkohë që Milani ka shumë mundësi të mos kualifikohet as në Europa League. Largimi i spanjollit është një tjetër rast i një vendimi shumë të nxituar, të marrë brenda pak muajsh. Në vend të tij erdhi Çerçi, por edhe ai u kalua tek Xhenoa. Më absurdja është që pagën ia paguan ende Milani.
Adil Rami e ka paguar vetë një pjesë të klauzolës së transferimit tek Milani, por ky xhest dashurie nuk ndikoi shumë tek klubi, që e la të largohet me ofertën e parë që iu paraqit. Tani është në finale e Europa League me Seviljen, si dhe një pjesë e rëndësishme e merkatos së verës. El Sharaui dukej i svenitur, por u ringrit frikshëm. Edhe në këtë rast kemi të bëjmë me një gabim të rëndë të drejtuesve të shoqërisë kuqezi. Me shumë mundësi do të qëndrojë tek Roma për 13 milionë euro, si dhe mund të ndikojë për ta vrarë përfundimisht ëndrrën europiane të Milanit.
