Kishte 10 vite që AC Milan nuk gjente një lojtar të aftë për të shënuar të paktën 10 gola në dy sezone rresht, por me 9 ndeshje në dispozicion, fantazisti portugez Rafael Leao mundet vetëm që të përmirësojë statistikat e tij. Luzitani ka dhënë së fundmi një intervistë për mediat amerikane ku ka folur për ecurinë dhe momentin e “Il Diavolo Rossonero” që i drejtohet fundit të sezonit në kërkim të një vendi të katërt në kampionat e mundësisht afrimit me finalen e Stambollit në Champions League.
Më në fund u rikthyet te goli…
Jam shumë i lumtur që shënova e sidomos ndaj një ekipi të vështirë si Napoli. Jam i kënaqur më shumë për tri pikët e rëndësishme, por nuk kemi bërë asgjë ende pasi duhet të vazhdojmë më këtë ritëm edhe në ndeshjet e radhës.
Duket sikur ju ndihmoi rikthimi në rolin e vjetër?
Në fakt ndihem shumë më komod në rolin e sulmuesit të krahut. Skema 4-2- 3-1 më mundëson të luaj gjerësisht në krahë dhe që të pres pasimin e duhur për të sulmuar qendrën. Kur luaj statik në qendër në 3-4-2-1 më duket sikur nuk kam hapësirë për t’u rrotulluar e për të tentuar të dribloj rivalë, ndaj preferoj më mirë këtë sistem loje, pasi më përshtatet më tepër.
Mendoni se për paraqitje si ajo ndaj Napolit ndikon më shumë skema apo qasja mendore?
Do të thoja të dyja. Kohët e fundit ndaj nesh ka pasur kritika dhe e dinim se mund t’i heshtnim vetëm duke luajtur siç dimë. Kundër Napolit në një stadium të vështirë bëmë ndeshjen në mënyrën më të mirë, ndaj edhe fituam.
Edhe Brahim Diazi me këtë formë ndihmon apo jo?
Është një lojtar fantastik me të cilin merrem vesh shumë mirë. Për mua është kënaqësi e veçantë të luaj me të tillë lojtarë. Ata bëjnë gjithçka më të lehtë dhe në fushë argëtohemi të gjithë nëpërmjet lojës dhe rezultatit.
Cila është diferenca mes Milanit aktual dhe atij të fillimit të vitit?
Ndryshuam sistemin e lojës sepse donim të ishim më kompaktë në prapavijë. Me të arritur qëllimin, trajneri e kuptoi se mund të ndryshonte përsëri skemë.
Me Napolin do të keni hesape edhe në Champions. Do të jeni gati?
Ajo e së dielës ishte finalja e parë dhe e interpretuam siç duhej. Ndaj tyre të mërkurën do të jetë ndryshe, por ne do të dimë të jemi gati. Suksesi i fundit na shton besimin për të arritur objektivat tanë e për të qëndruar sa më pranë kreut të renditjes.
Panorama
The post Milan/ Super statistika, bota nën këmbët e Leaos appeared first on 27.
