Kreu i Kuvendit, Ilir Meta ka mohuar publikisht se synon postin e Presidentit të Shqipërisë, përsa kohë është në krye të LSI-së.
I ftuar në emisionin “Zonë e Lirë” Meta tha se me rëndësi është që procesi të jetë sa më normal dhe kandidati të gëzojë respektin e të gjithëve.
“Kam thënë që jam kryetar i LSI, kam marrë një mandat për të drejtuar këtë lëvizje dhe nuk mund t’i shmangem kësaj përgjegjësie. Në gjithë këtë klimë ku ndodhemi na duhet të jemi shumë të kujdesshëm, sepse çështja e presidentit është shumë serioze. Shqipëria ka burra dhe gra që mund ta bëjnë shumë mirë këtë punë. Unë e refuzoj personalisht. Nuk e synoj si post. Kandidati duhet të jetë një njeri që të gëzojë respektin e të gjithëve. Duhet të zhvillohet në një proces normal politik dhe procesi të jetë sa më konsensual”, tha Meta.
Sa i përket lajmeve se i ka kërkuar Edi Ramës shkarkimin e ministrit të Brendshëm, Saimir Tahiri, Meta e ka mohuar diçka të tillë duke i konsideruar këto pretendime si thashetheme.
