Ish-kryeministri Sali Berisha ka komentuar vendimin e Gjykatës Kushtetuese për të mos shkarkuar Ilir Metën si President i Republikës. Pasi doli nga Kuvendi, Berisha tha para gazetarëve se Kushtetuesja duhet të dënojë Kuvendin për falsifikimin e dokumenteve.
Ndër të tjera, Berisha shtoi se nuk ka pasur dyshime se ky proces ishte një krim kushtetues, ndërsa bëri fajtor të drejtpërdrejtë kryeministrin Edi Rama që përpiqet të marrë të gjitha pushtetet.
“Duhet të dënonte parlamentin për vendimin e tij, me të cilin synonte rikthimin e censurës në Shqipëri, duke filluar kështu nga Kryetari i Shtetit. Gjykata Kushtetuese në vlerësimin tim në vendimin kryesor duhet të kishte vetëm një pikë, dënoj Parlamentin për vendimin e tij antidemokratik, antikushtetues, antiligjor. Sikundër Gjykata Kushtetuese duke treguar varësinë e tmerrshme nga politika nuk dënoi falsifikimin, që Parlamenti iu bëri vendimeve të tij, vetëm e vetëm për t’i vendosur me falsifikim në procedurë e kohë. Pra, ky është komenti, nuk kam pasur kurrë asnjë dyshim më të vogël se aty ka pasur krim kushtetues në qëndrimet e presidentit apo ka pasur shkelje serioze të Kushtetutës, përkundrazi shkelje flagrante të Kushtetutës ka bërë Parlamenti, ka bërë dhe bën Edi Rama, që kërkon të marrë të gjitha pushtetet në këtë vend, përfshirë dhe atë të Presidentit”, tha Berisha.
