Presidenti i Republikës, Ilir Meta, ka shprehur dhimbjen e thellë për ndarjen e parakohshme nga jeta të artistit të madh, Rexhep Çeliku.
Kreu i Shtetit e cilësoi “lajm drithërues” ndarjen nga jeta të “Mjeshtrit të Madh” nga kjo botë, teksa e quan atë emblemë të valles dhe traditës sonë kulturore, të papërsëritshmin e kërcimit tonë, fisnik dhe atdhetar, frymëzues të spikatur të brezave të artistëve të rinj.
Me anë të një statusi në facebook, Meta shkruan:
“Me dhimbje të thellë mësova lajmin drithërues të ndarjes së parakohshme nga jeta të Rexhep Çelikut, emblemës së valles dhe traditës sonë kulturore, mjeshtrit të madh të skenës së Ansamblit tonë Shtetëror, të papërsëritëshmit të kërcimit tonë popullor, njeriut fisnik e atdhetar, frymëzimit të spikatur të brezave të artistëve të rinj. I shpreh ngushëllimet më të sinqerta familjes, njerëzve të tij të dashur e kolegëve për këtë humbje të madhe e të pazëvendësueshme”.
