Kryetari i LSI, Ilir Meta, tha sot se ngritja e Byrosë Së Hetimit varet nga opozita dhe në se opozita pranon, mazhoranca është gati ta formalizojmë që tani
Në një intervistë në News 24, Meta tha se partia e tij është e gatshme ta votojë Byronë Kombëtare të Hetimit, kur të jenë gati PS dhe PD. I pyetur se në vartësi të kujt do të jetë ky institucion, Meta tha se më e rëndësishme është garantimi i funksionimin efikas të Byrosë së Hetimit.
I pyetur për draftin e mundshëm nga SHBA për Byronë e Hetimit, Meta tha se nuk e ka në dorë një draft të tillë por se LSI favorizon çdo draft që lufton korrupsionin. “Unë besoj se kjo është një çështje që më shumë varet prej opozitës se sa prej maxhorancës. LSI favorizon çdo zgjidhje konsensuale, që respekton parimet kushtetuese dhe njëkohësisht që garanton që kjo agjenci e konsolidon shtyllën e hetimit, sepse kjo është shumë e rëndësishme, dhe rrit efektivitetin në luftën kundër korrupsionit dhe krimit të organizuar.
Për LSI, fryma e rekomandimeve të Komisionit të Venecias, ka qenë dhe mbetet tepër e rëndësishme. Ajo jep garanci për të ruajtur themelet e Kushtetutës tone”, tha Meta.
