Ligjvënësja e PDIU, Mesila Doda ka marrë pjesë në mbledhjen e sotme të Komisionit Qendror të Zgjedhjeve për të kërkuar respektimin e vullnetit të popullit duke i shtuar subjektit politik PDIU votat e mohuara gjatë numërimit të votave për zgjedhjet parlamentare.
Doda siguron se me shtimin e votave, të cilat me qëllim i kanë kaluar një subjekti tjetër politik, kreu i PDIU-së Shpëtim Idrizi merr mandatin e tij si deputet në Kuvendin e Shqipërisë.
“Jam për dy arsye këtu. Në tabela rezultati nuk është i saktë dhe nuk është i saktë qëllimisht, pasi është ndryshuar. Këtu ju kam sjellë 38 vota, por duhen parë të gjitha.
Po kërkohet që mandati i PDIU t’i kalojë një kandidati tjetër. Në materialet filmike që disponojmë ka parregullsi, votat e gjetura nuk janë pasqyruar në tabelë.
Qarku i Tiranës të hiqet nga rendi i ditës, unë po iu jap të gjitha argumentet që ka pasur parregullsi prandaj kërkoj që të shtyhet miratimi i tabelës për këtë qark. Në materialet filmike që kemi ka skandale, vullneti i 52 shqiptarëve është tjetërsuar.”, tha Doda.
PDIU kërkoi nga KQZ shtyrjen me 24 orë të miratimit të tabelës së rezultateve të Qarkut të Tiranës.
