Në kishën Santa Marta në Vatikan Papa Françesku ka ftuar të gjithë të komunikojmë më shumë me njëri-tjetrin për të shtuar më shumë kulturën e takimit dhe për të shmanguar atë çfarë ai e ka quajtur fatkeqësi të kësaj bote, indiferencën.
“Të vështrojmë mirë, të hapim veshët, të prekemi me dorë dhe të shprehemi me gjuhë, me gjuhën e zemrës”- u shpreh Papa në mesazhin e tij.
Mesazhi:“Ne jemi mësuar me kulturën e indiferencës dhe duhet të punojmë e të kërkojmë kulturën e takimit, të një takimi të frytshëm, të një takimi, që i kthen çdo njeriu dinjitetin e vet si bir i Hyjit, dinjitetin e të gjallëve. Jemi mësuar me indiferencën kur shohim fatkeqësitë e kësaj bote, ose gjërat e vogla: ‘Mëkat, të shkretët njerëz, sa vuajnë’ e pastaj, kalojmë përtej.
Por nëse nuk shoh – e nuk mjafton të shohësh, duhet të vështrosh mirë – nëse nuk ndalem, nuk prek me dorë, nuk flas, nuk takohem vërtet e nuk mund të ndihmoj në krijimin e kulturës së takimit. Në tryezë, në familje, sa herë hamë, jemi duke parë televizor apo duke shkruar mesazhe në celular. Çdo njeri në atë tryezë është indiferent ndaj atij takimi. Kështu, edhe në bërthamën e shoqërisë, që është familja, nuk ka takim.
Na ndihmoftë Zoti të punojmë për kulturën e takimit, thjesht, ashtu siç bëri Jezusi. Jo vetëm të shohim: të vështrojmë mirë. Jo vetëm të dëgjojmë: t’i hapim mirë veshët. Jo vetëm t’i hasim njerëzit në rrugë: të ndalemi. Jo vetëm të themi ‘sa keq, të shkretët’, por të lëvizim me dhembshuri. E pastaj të afrohemi, të prekim me dorë e të themi në gjuhën, që secili e përdor në ato çaste, në gjuhën e zemrës: ‘Mos qaj’ e të japim të paktën një pikëz jete”.
