Nga Alketa Ipeku
Kisha një merak…. Meraku im në fakt, pas dy muaj mësimi online lidhej me kthimin në punë.
Merak si mësuese, merak si prind. Merak e kishim në bisedat me kolegët si do funksiononte kthimi në ambientet e shkollës. Shpesh dhe bënim shaka për telefonat, të cilët u kthyen nga mjet komunikimi, në një mjet të domosdoshëm për zhvillimin e mësimit, gjë e cila ia humbi privatësinë secilit nga ne.
Merak si do ia dilnim, merak cili do e përdorte më parë celularin në familje (prindi-mësues apo fëmija-nxënës) duhet të pranojmë faktin se jo të gjithë i kanë mundësitë të kenë të gjithë pjesëtarët e familjes smartphone, ose jo të gjithë u lejojnë fëmijëve celularë individual; po është temë e gjerë e nuk po i hyj.
Tjetërkund e kam merakun. Tashmë, jemi para faktit që rinisim procesin mësimor për t’u ardhur në ndihmë maturantëve në këtë fazë të vështirë. Jemi të përgjegjshëm e të ndërgjegjshëm për detyrën që kemi, megjithëse shumë mësuesve do u takojë që veç mësimit në shkollë do u duhet që me kthimin në shtëpi të rifillojnë dhe mësimin online me klasat e tjera që mund të kenë mësim (klasa X-XI).
Pra, paradite në klasë, pasdite në celular. Askush nga ne nuk kundërshtoi, po si për ironi të fatit dikush merakoset për ne, por jo për atë ç’ka duhet të merakoset vërtetë. Nuk i zuri meraku si po e ndajnë kohën fizike mësuesit mes punës e familjes, pasi shpesh na duhet t’u përgjigjemi sms-ve, telefonatave orar pa orar, as për sytë që nuk po na shohin më, se duhen dhe video ndër të tjera, as humbjen e privatësisë, as për kushtet apo pajisjen me mjete digjitale, as për kushtet fizike në shkolla, (uji vjen me orar në shtëpi e jo më në shkollë) e lista është shumë e gjatë.
Meraku që na zuri ata, të cilët flasin nga maja e Olimpit, ishte pikërisht përdorimi i telefonit në shkollë nga mësuesit e nxënësit. (Harruat që jemi në gjendje të jashtëzakonshme deri më 23 qershor) Ju lutem thirrini mendjes! Mos e fyeni mësuesin me mesazhe të tilla apo platforma kontrolli.
Jemi njerëz si ju e ndoshta shumë më të përgjegjshëm e punëtorë, me merak akoma më të madh se i juaji. Na lejoni të punojmë të qetë, pa stres se e kemi me bollëk. I kaluam kufijtë e profesionit. Nuk lamë trajnime online pa ndjekur. Tashmë, jemi bërë ekspertë të programeve kompjuterike, montazhierë, audio e kush dreqin po merr vesh. Nxirrni urdhra si t’jua rrokë mendja. Ju lutem mos u përpiqni të na fyeni.
Po një gjë ua them me bindje: Mos e kini me merak dhe këto urdhra do zbatohen 100 % si gjithmonë. Këtë e kemi merak vetë, ju kini merak çfarë sillni, sepse po t’i mbledhësh udhëzimet apo shkresurinat që na vijnë duket sikur mbledh pjesëzat e një puzzle-i, të cilat janë ngatërruar keqas, pasi shpesh jeni kontradiktorë.
Unë e kam merak vetë punën e jetën time. Po të ish për ju ….. s’e di, veç mos u merakosni për atë që në këto ditë na e kthyet në ferr. Celulari na u kthye në ves, kemi krijuar varësi. Ju lutem flini të qetë e rrini pa “MERAK”!
Unë e kisha një merak po ju ma hoqët!
