Fetah Marra vau në mënyrë makabre 65-vjeçaren, Fatime Suli, në fshatin Kozare të qytetit të Kuçovës në 20 janar të këtij viti.
Ndërkaq Prokuroria e Gjykatës së Shkallës së Parë në Berat, ka dërguar në gjyq Marrën, 58-vjeçarin që mbyti, zhveshi dhe hodhi në një kanal 63-vjeçaren.
Kujtojmë se autori i vrasjes së Fatime Sulit deklaroi në polici se viktima i kishte atij 60 mijë lekë (të vjetra) borxh, si rezultat i mbarështimit të bagëtive.
Historia
Ngjarja e rëndë ka ndodhur mbrëmjen e 20 Janarit në lagjen “Havaleas” në fshatin Kozare.
Gijotina.com arriti të siguroj atë kohë dëshminë që autori ka dhënë para uniformave blu, ku ka treguar itinerarin e krimit dhe shkakun që e çoi drejt ngjarjes së rëndë. Marra ka deklaruar se viktima i kishte atij 60 mijë lekë të vjetër borxh dhe refuzonte t’ia jepte. Në dëshmi, burri thotë se i gjithë fshati mbarështonte tufat e dhive me 3 cjeptë e tij të racës dhe për çdo mbarështim i paguanin atij 5 000 lekë (të vjetër).“Fatimeja më kishte 60 000 mijë lekë (të vjetër) nga mbarështimi i tufës së saj dhe unë shkova për t’ia kërkuar. Kur shkova atje, e pashë shumë afër duke biseduar me një bari tjetër, Izetin, dhe u largova. U ktheva përsëri 1 orë më vonë, isha i pirë dhe pasi e pashë vetëm, iu afrova dhe i kërkova lekët. Ajo filloi të bërtiste e të më gjuante me gurë dhe unë e kapa nga prapa në fyt dhe e shtrëngova. Pas disa sekondash ajo ra në tokë pa ndjenja. E shkunda disa herë dhe kur e pashë që nuk po merrte frymë, e kuptova që kishte vdekur. Nga frika se mos me zbulonin, e tërhoqa zvarrë disa metra për ta hedhur në një kanal në afërsi të serave të saj dhe e mbulova mirë me gjethe e rrozga, duke shpresuar që do ta gjenin me vonesë dhe nuk do të më fajësonin mua. U largova me vrap mes për mes tokave dhe shkova në shtëpi, kur më doli pija dhe po kujtohesha, as vetë nuk e besova që e gjitha kjo kishte ndodhur me të vërtetë, deri në momentin që erdhi Policia dhe më morën me furgon”, mësohet të ketë deklaruar ai. Marra ka deklaruar se viktima e kishte qëlluar me gurë dhe kjo ishte arsyeja pse e kishte mbytur. Në lidhje me faktin se gruaja u gjet e zhveshur nga mesi e poshtë dhe akuzat e hedhura se ai mund të kishte dashur të abuzonte me të, mësohet se Marra ka deklaruar se tutat iu hoqën në momentin kur po e tërhiqte zvarrë për ta hedhur në kanal. Ai ka pranuar se ka qenë katër herë i divorcuar dhe se gratë e kishin braktisur për shkak se konsumonte alkool dhe më pas bëhej i dhunshëm ndaj tyre.
