Konsullata e Përgjithshme e Shqipërisë në Milano ka njoftuar të gjithë qytetarët shqiptarë që jetojnë në Itali se deri më datën 3 dhjetor, ditë kur edhe përfundon gjendja e jashtëzakonshme do të shërbejnë vetëm për raste emergjente.
Njoftimi i plotë i Konsullatës Shqiptare në Milano:
Konsullata e Përgjithshme e Republikës së Shqipërisë në Milano, në zbatim të Dekretit të Kryeministrit Italian Giuseppe Conte i firmosur ne dt. 03.11.2020 i cili ka hyrë në fuqi sot në dt. 06.11.2020, komunikon se ndërpriten përkohësisht të gjitha shërbimet konsullore deri në datën 3 DHJETOR 2020.
Do të garantojmë shërbimin me postë si edhe vetëm rastet urgjente. Qytetarët që kanë të fiksuar takim për pasaportë dhe kartë id, do të njoftohen nga ne me e-mail për datën e re të takimit, sapo situata të normalizohet dhe të fillojë sërish lëvizja e lirë nga një qytet në tjetrin si dhe hyrja në Lombardi rajon i konsideruar zonë e kuqe.
Kontrolloni vazhdimisht profilin tonë zyrtarë në Facebook dhe faqen tonë zyrtare në ëeb për njoftime të reja. Gjithashtu, ftojmë të gjithë qytetarët tanë të ndjekin me përpikmëri dhe rigorozitet të gjitha udhëzimet e Qeverisë Italiane me qëllim ndalimin e përhapjes së virusit Covid-19.
Njoftimi vjen pas mbylljes së pjesshme të Milanos dhe Lombardisë deri më datën 3 dhjetor. Italia është shteti më I goditur nga pandemia e Covid-19, ku deri më tani raportohet për 40.638 të vdekur.
