Policia e shtetit ka arrestuar tre persona dhe është shpallur në kërkim nënkryetari i Bashkisë së Mallakastrës, H. Serjani.
Sipas policisë shtetasit D.D, 57 vjeç, banues në Ballsh (shofer i Bashkisë Mallakastër); E.I, 39 vjeç, banues në Ballsh (punonjës i Bashkisë Mallakastër); N.K, 58 vjeç, banues në Ballsh (roje shkolle); janë autor të dyshuar që kanë mbyllur dy qendra votimi në qytetin e Ballshit si dhe 21 të tjera në fshatrat e Bashkisë.
Njoftim i Policisë:
Arrestohen në flagrancë 2 punonjës të Bashkisë Mallakastër dhe roja e një shkolle në qytetin e Ballshit, si edhe shpallet në kërkim nënkryetari i Bashkisë Mallakastër për veprën penale “Pengimi i subjekteve për zgjedhjet në organet përfaqësuese” e kryer në bashkëpunim.
Specialistët për Hetimin e Krimeve në Komisariatin e Policisë Mallakastër arrestuan në flagrancë 3 shtetas:
– D.D, 57 vjeç, banues në Ballsh (shofer i Bashkisë Mallakastër);
– E.I, 39 vjeç, banues në Ballsh (punonjës i Bashkisë Mallakastër);
– N.K, 58 vjeç, banues në Ballsh (roje shkolle);
Gjithashtu u shpall në kërkim dhe po punohet për kapjen e shtetasit H.S, 38 vjeç, banues në Ballsh, (Nënkryetar i Bashkisë Mallakastër).
Nga tërësia e veprimeve hetimore rezulton se këta shtetas janë autor të dyshuar të mbylljes dhe bllokimit 2 shkollave në qytetin e Ballshit dhe 21 shkollave në fshatrat e Bashkisë, të cilat nga Komisioni Qendror i Zgjedhjeve janë vendosur e miratuar si Qendra Votimi për zgjedhjet e Pushtetit Vendor të datës 30.06.2019.
Materialet proceduriale i kaluan Prokurorisë pranë Gjykatës së Shkallës së Parë Fier për veprime të mëtejshme hetimore.
