Ka nisur mbledhjen komisioni i posaçëm për reformën në drejtësi.
Vlen të theksohet se në mbledhjen e Komisionit, nuk janë të pranishëm përfaqësuesit e opozitës.
Të pranishëm në mbledhje, përveç deputetëve të mazhorancës janë edhe ekspertët vendas.
XHAFAJ: NEGOCIATAT VAZHDOJNË, OPOZITA TË REFLEKTOJË E TË VOTOJË KËTË REFORMË HISTORIKE
Fill pas mbylljes së mbledhjes së Komisionit të Reformës në Drejtësi, kreu i këtij komisioni, Fatmir Xhafaj deklaroi se vijojnë negociatat për të gjetur rrugën e konsensusit për reformën në drejtësi. Nga ana tjetër ai theksoi se ky nuk do të ishte takimi i fundit për mbledhje, pasi priten të tjera diskutime.
“Faleminderit për kontributin në gjithë këtë proces të gjatë e të vështire. Kjo është mbledhja e fundit para seancës, Por nuk besoj se do jetë e fundit, pasi mbledhja e sotme ishte procedurale, për raportin. Kjo ishte detyra që do duhej të bënim për ti hapur rrugë rendit të ditës e përcaktuar për ditën e enjte, siç e bëri publik edhe kryetari i Kuvendit, Meta, ku do të jetë si pika e parë e rendit të ditës: ndryshimet kushtetuese. kemi hequr një pjesë të neneve në gjithë këtë diskurs politik. Kemi reflektuar edhe progresin e deritanishëm; formulën hibride. Por, një gjë është e qartë dhe e sigurt; negociatat vazhdojnë për të gjetur një zgjidhje lidhur më çështjen e ‘Vetingut’ dhe rolin e operacionit ndërkombëtar të monitorimit. Ne shpresojmë dhe besojmë se do gjendet një gjuhën e përbashkët në këtë proces negocimi dhe më pas ato do reflektohen në draftin kushtetues.”, tha Xhafaj.
Ndërkohë, ai i bëri thirrje nga ana tjetër opozitës që të reflektojë në këto orë që kanë ngelur për të votuar reformën në drejtësi, sipas tij me një rëndësi historike.
“Ka ende punë për disa çështje. Opozita duhet të reflektojë dhe të kuptojë rëndësinë historike të këtij projekti dhe ta votojmë këtë reformë në 21 korrik. Para pak minutash isha tek kryetari i Kuvendit, i cili më pohoi se kishte bërë një bisedë telefonike me komisionarin Hahn, ndërsa i ka kërkuar që ai të bashkëbisedojë edhe me kryetarin e PD, për tu infolvuar në orët në vijim”, pohoi Xhafaj.
Nga ana tjetër Xhafaj u pyet nëse do të mbahet takimi trepalësh Rama-Meta-Basha, ndërsa ai u përgjigj se nuk ka rëndësi nëse ata mblidhen sot apo nesër.
“Ky është një proces duke vazhduar negocimi, nëse mblidhen sot apo nesër, ka pak rëndësi. Shpresoj dhe besoj se edhe në këto orë të mbetura, grupet parlamentare do ndejnë peshën përballë qytetarëve, të cilët meritojnë të kenë një drejtësi ndryshe dhe të barabartë për të gjithë.”, përfundoi Kreu i Komisionit të Posaçëm për Reformën.
